FactsPositive Thinking

The Story of a Middle Class Boy

The story of a middle class boy Posted On
Posted By Sanjit Gupta

Aaj office se lautate huye dimag me ek baat aayi, ki life ke lagbhag 28 saal gujarne ke baad bhi abhi tak clear nai hua ki mai kis class ka ladka hu. From which class do I really belongs? Whether it’s lower, middle or upper. Yai sochte huye man me aaya ki kuch likhta hu.

AAj se 28 saal pahle mai paida hua, ek well doing middle class family aur ache se bolu to ek lower middle class family. Middle class family thi to Papa city me rahte the, baki ki family gao me rahti thi. Gao me pala badha, wahi pe dost bane, wai khela, wai padha aur aage badha. Papa shahar me the to thodi bahut input shahro ki bhi mil jati thi, aur mai khub khush ho leta tha ki jaha kisi ko pata nai hai ki shahar hota kaisa hai waha mai shahar se ghum kr aa jata hu. Isi jagah pe meri character dual ban gayi. Tha to mai gao ka, inspire ho rakha tha shahar se to mai bich me hi tha, matlab samjh rahe ho na aap , ki na to mai shahar ka tha na gao ka.

Gao ke ek chote se school me padhta tha mai, jaha class me sirf 20-25 ladke hi padte the, waha pe mai topper tha. Ye mai sochta tha ki topper tha mai, mere gao wale bhi yai sochte the lekin tha to asli me kuye ka mendhak. But mendhak se thoda jyada tha mai, waqt aage gya to mai us kuye se nikal kr shahar bhi aa gya. Nayi duniya, naye log, naya experience. Gao me khud ko bada samajhta tha mai, shahar aakar pata chala yaha mere jaise hazaro hai. Competition kafi jyada tha, but maine bahut acha kiya, mai lada, maine struggle kiya aur apna sthan bhi hasil kiya lekin waha bhi mai bich me hi tha, mai ekdm uper nai ja paya. Ghar wale to khush the per mai khush nai tha kyuki meri soch middle se uper ki thi, aur sabse badi takleef apko yahi hoti hai ki aap sochte high class ho but resource apke pass middle class wali hoti hai.

Khair mai phir bhi lada, mai ada raha!

Gao me tha to meri Hindi bahut achi thi, achi matlab jabardasht wali. Shahar aaya to English ke piche bhagna pada. Meri bato pe dhyan dijiye bhagna pada kyuki yaha wahi trend me tha. Ab bachpan se jo banda Hindi ghasha hai usko English jitna bhi bata do bahut dikkat hoti hai. Phir bhi mai padha aage badha, acha bhi kiya but bahut acha nai kr paya.

Ha ! meri Hindi itne dino me jarur kharab ho gayi. Matlab wai law of conservation of energy wala concept dikha mujhe, i.e. energy neither be created nor be destroyed. To wai hua jitni meri English achi huyi utni hi meri Hindi kharab huyi. Meri halat apko isi article ko padhkar pata chal gya hoga ki mai itna helpless hu ki Hindi ko mai English me likh raha hu. Khair hasna band kariye kyuki yai to hai meri kahani. Na to pakad sakta hu na chor sakta hu.

Phir bhi mai lada ! Mai Jid pe ada raha!

Sapne kuch aur dekhe the maine apne career ko lekar, wo meri high profile soch thi, lekin family ki halat ne kuch aur krne ko majbur kr diya. Khair mai waha bhi bhaga nai, mai waha bhi gya. Maine mehnat kari, maine rasta banaya. Kisi ne mujhe kuch bhi bataya nai, mai apna guide khud bana.  Maine waha khud ko sabit kiya. Aaj jab paisa kamane ki bari aa rahi hai. Mai job kr raha hu. Usme me bahut sari bate hai. Agar mai private job kar raha hu to mujhe sarkari job kyu nai mili?

Ye hamari society ka auto question hai is condition me . Yaha conditional loop chalta hai;

If {……………….}

Else

{}

;

ye wala !

To matlab sarkari naukari kyu nai ? Agar sarkari kar rahe ho to kaun sa grade hai kitni salary?

Matlab hamari sari mehnat jaye G***D me agar apne sarkari job nai kari to.

Aur hamare sapne ka kya?

To tumhare sapne ki maa ki aankh……

Mai to dara sahma ladka hu middle class wala, bachpan se hi daraya gaya mujhe. Sala jaha pe jarurat nai thi darne ki waha bhi logo ne hamari mari. Phir bhi mai hara nai, Mai lada aur aage bada !

Bachpan se hi to sala terms and conditions apply karke palte ho. Bhejte ho padne ke liye shahar ke kisi college me, bade engineering college me aur condition de dete ho ki beta kuch aisa kaam mat krna ki pariwar ki naak kat jaye. Ab saala us kaam pe hamara vash chalta hai kya?

Sala ho gya Pyar !

Ab hum hai middle class ke ladke hamari halat dekhiye.

“Hum bahut ache ladke hai, hum padte bahut ache hai, hum bahut cool bhi hai, smart hai, izzatdari pasand hai hame, hum ladkiyo ki bahut izzat karte hai. ”

To kisi ek ladki ne hame bhi izzat kr li.

Samajh hi gaye honge mai kya kahna chahta hu. Ek ladki ko mai acha lag gya.

Hame acha laga ki nai wo mat puchiye. Ladko ki kya bataye koi ladki aakar bole to hamse na nai kaha jata 🙂 !

To equation kuch aise baitha hua tha mere life ka ki, Maa-Baap is aasha me the ki beta NAAM ROSHAN kar rha hai aur inka sabse bada maulik adhikar ye hota hai ki beta ho ya beti, unke shadi pe inhi logo ka copyright hota hai. To kisi aur ladki ke sath wo hame dekh nai skte the. To matlab agar mai khud se shadi krta to maa-baap ko bhul jao.

Idhar ladki hamse is aasha me thi ki banda talented hai kuch badiya hi karega. Galatfahmi palne ki cheez hoti hai, wo paal rahi thi. Waise bhi college ki ladki soch kitna sakti hai, wo hawa me hi thi.

Agla part tha ladki ke pariwar wale, unhe pasand nai tha ki ladki kisi middle class ke ladke se baat bhi kare. To waise hi mera patta gol tha waha pe.

Ab is chakravyuh me mai Abhimanyu ki tarah phansa hua banda, aur raashta hi kya tha marne ke siwa. Cheez aisi thi ki aur koi serious ho na ho mai to serious tha insab ko lekar.

Waqt guzra aur aise guzra ki pata bhi na chala. Ab ladki bolti thi kuch acha kar lo phir papa se milwaungi. Uska matlab tha ki mai uske baap se milne ke kabil hi nai tha. To sala uske baap se milne ke liye ab ek entrance exam dena padega.

Mai bhi soch raha tha ki kuch acha kar lu to apne maa – baap se isko milwa dunga. Mere maa- baap soch rahe the ki kuch acha kar le phir iski shadi XYZ ki beti se krwa dunga. Udhar meri premika ka baap soch raha tha ki ye musibaat jaldi se apne career ke chakkar me bhaage taki mai apni beti ki shadi krwa du.

Ab aapko samjh me aa raha hoga kitni value hai meri. Har koi mere hi baare me soch raha tha. Aant me jeet sacchai ki hi huyi. Mai job ki talash me bahar nikal aaya aur ladki se wada kr ke aaya ki mai laut kr aaunga. Maine apne baap ko bhi wada kiya ki papa mai kuch acha krke dikhaunga phir aap meri shadi karwa dena. Hame apne middle class career ko banate banate saal bhar kaise gujar jata hai pata nai chalta hai per jo dur hote hai usko pata chalta hai janab. Wai hua , hamari premika ko kuch jyada hi pata chala aur unka dhyan dheere dheere hmpe kaam hone laga. Khair ladki achi thi jab tak mai waha uske liye lad raha tha, struggle kar raha tha tab tak wo mere ko dilasha deti rahi. Phir jab mere paas kuch aa gya, to wo bhi meri jindagi ki tarah law of conservation of energy wala principle lagakar chali gayi.

Mai tha hi middle class aaj bhi middle class hi hu. Ab jab pariwar ki halat dekhta hu to itni jyada kamiya hai ki unko thik krte karte meri jindagi chali jaegi aur mai phir se middle class hi rah jaunga.

Lekin phir bhi mai ada hu. AAj bhi buland khada hu !

Mai harta nai.

Dedicated to all Middle class Boyes!

 

Related Post

leave a Comment

This site uses Akismet to reduce spam. Learn how your comment data is processed.